Blogglestur og leti

Dagurinn í gær var sá fyrsti sem ekki voru bókaðir neinir gestir.  Við Ingþór kláruðum að þrífa frá deginum áður, síðan ætlaði ég að kíkja aðeins á bloggið, það er að segja á það sem þið kæru vinir hafið verið að blogga.  Eins og ég sagði þá ætlaði ég bara aðeins að kíkja.  Þegar ég síðan stóð upp frá tölvunni þá hafði ég heimsótt hvern og einast sem er skráður hjá mér sem bloggvinur. 

Ég sé að sumir hafi ekki verið duglegri en ég í að blogga en aðrir eru rosalega duglegir við það.

Þegar líða tók á daginn og engir gestir komu ákvað ég að skella mér á sjó með strákunum mínum, en það eru maðurinn minn, sonur og frændi.  Ef einhverri ástæðu tafðist að leggja af stað eða nógu lengi að túristarnir fóru að tínast inn og ekkert varð úr því að farið var á sjó.  Það verður að bíða betri tíma.

3 atriði voru kærð

Eins og ég talaði um í gær þá fengum við hjónakornin á okkur smá kæru.  Ég ætti að láta þetta vera en það er bara svo kjánalegt þegar fólk er að gera svona, skuli ekki skoða hlutina aðeins betur áður en farið er af stað.

Í fyrsta lagi fór það í viðkomandi að við skulum kalla okkur hótel.  Telur hann í sinni fávissu að við getum ekki kallað okkur hótel þar sem við erum flokkuð sem gistihús innan Ferðaþjónustu bænda.  Sko.... Ferðaþjónusta bænda er bara einn af þeim aðilum sem versla við okkur, þannig að það skiptir ekki máli hvernig við erum flokkuð þar.  Það sem aumingjans maðurinn athugaði ekki heldur nægilega vel er að hann er sjálfur flokkaður sem gistihús innan FB en ekki hótel, en hann kallar sig Hótel ??????????

Liður tvö er að við skulum kalla okkur Breiðavík / Látrabjarg.  Nei það megum við ekki af því að þá erum við að herma eftir honum.  Ætli við höfum ekki verið komin hingað 5-6 árum á undan honum og fórum við strax að kalla okkur / Látrabjarg eða við Látrabjarg.  Upphafleg ástæða þess er að í fyrsta sinn sem við pöntuðum vörur að sunnan þá lentu þær á Breiðadalsvík,  síðan er til Breiðavík á Snæfellsnesi og þá er til gata í Reykjavík sem heitir Breiðavík, þannig að / er til aðgreiningar og það er bar til eitt Látrabjarg og það er hér rétt við Breiðavík.

Nú þriðji liður er auðvitað töluvert alvarlegri en hinir.  Hann kærir okkur sem sagt í 3 lið fyrir að nota mynd af lunda í auglýsingum okkar.  Hefur einhver einkarétt á að nota lundann og ef við sem búum rétt við Látrabjarg og þá miklu lundabyggð sem þar er getum ekki notað hann hér á þessu svæði nú þá hver?  Ég bara spyr.

Ok nú skulum við aðeins skoða þessa aðila.

Fjöldi rúma: 24	Flokkun gististaða:Gistihús bænda

 

Grunnupplýsingar

Opið: 25.04-15.09

Hótel Látrabjarg er í næsta nágrenni við Látrabjarg eitt stærsta fuglabjarg heims sem er þekkt fyrir einstakt fuglalíf. Notalegt fjölskylduhótel sem býður rúmgóð og falleg herbergi, með og án baðs. Hótelið er staðsett í Örlygshöfn við sunnanverðan Patreksfjörð. Fjölbreyttur morgunverður og góður heimilismatur á kvöldin í boði fyrir hótelgesti. Fjölbreytt afþreying. Ævintýrasigling. Hótel Látrabjarg mun bjóða upp á daglegar ævintýrasiglingar undir Látrabjarg á 72 feta (22 metra) seglskútu. Skútan tekur 12 farþegar auk 3 manna áhafnar.  Skútuferðir bókist fyrirfram, gjarnan með hótelbókun. Kayak: Boðið verður upp á siglingar á kajökum frá skútunni. Sex kajakar verða um borð. Veiði. Sjóbirtingsveiði og veiði í silungsvötnum. Einnig verður boðið upp á veiði á sjóstöng. Bókist fyrirfram. Annað: Hvít sandströnd og hestaleiga í göngufæri. Minjasafnið á Hnjóti 4 km. Góðar gönguleiðir í næsta nágrenni,. Vandaður heilsunuddpottur til afnota fyrir gesti..    Nágrennið: Látrabjarg. Rauðasandur, Kollsvík, Litli Vestfjarðarhringurinn, Patreksfjörður, Tálknafjörður, Bíldudalur (Selárdalur), Dynjandi einn fallegasti foss landsins, Safn Jóns Sigurðssonar á Hrafnseyri, Vatnsfjörður heimili Hrafna Flóka Barðaströnd ofl. ofl. Níu holu golfvöllur í botni Patreksfjarðar og ný útisundlaug á Patreksfirði Frá Reykjavík er ekið til Patreksfjarðar gegn um Búðardal eða með ferju frá Stykkishólmi. Í Botni Patreksfjarðar er beygt í átt að Látrabjargi á veg 612.Ekið er um 26KM etir vegi 612 framhjá Minjasafninu á Hnjóti og síðan beygt til hægri á næstu gatnamótum. Þaðan ekið 3 km eftir vegi nr. 615 framhjá bæjunum Efri og Neðri Tungu í Örlygshöfn. Hótel Látrabjarg er þar á vinstri hönd. Næsta þéttbýli/sundlaug/verslun: Patreksfjörður 40 km. Gestgjafar:  Sigríður Huld Garðarsdóttir og Karl Eggertsson. Hér að ofan má sjá hvernig þessi aðili auglýsir sig hjá FB.  Skútan sem hann bauð upp á og kajakarnir komu aldrei.  Ég veit ekki hvernig þetta mál fer hjá lögfræðingunum. En að fólk skuli detta það í hug að senda svona kærur og fara fram á skaðabætur er auðvitað út í hött, sérstaklega þegar viðkomandi er ekki með rekstrarleyfi.

Á ég að birta kæruna?

Þannig er mál með vexti að fyrir skömmu fengum við (Hótel Breiðavík) á okkur kæru.  Kæra þessi er í þrennu lagi.  Við erum kærð fyrir ólögmætta viðskiptahætti.  Er hún er í raun svo vitlaus að það ná engin orð yfir það.  Í raun á ég ekki að vera að ergja mig á þessu, en..................? 

Því spyr ég ykkur að ég að birta kæruna hér og síðan rökstyðja hana?  Eða??

Starfsfólkið

Ég hef mikið verið skömmuð fyrir það undanfarin ár að ég sé með ef fátt starfsfólk.   Í sumar varð breyting á því við vorum allt í allt 13.  Reyndar unnum við ekki öll í einu því vaktarplönin voru þannig að starfsfólkið vann 15 dag og átti síðan frí í 6 daga.  Þetta kom mjög vel út, fólkið vann vel og síðan fóru þau í ferðalög á milli og alltaf tvö og tvö saman (eða tvær).  Hér að neðan má sjá myndir af þeim sem unnu í lengri eða skemmri tíma frá byrjun maí til lok ágúst.

                              Fyrstan má telja Ingþór hann vinnur bæði við búið og ferðaþjónustuna

Þá er það hún Maggý mín sem nú er farin til Akureyrar

Johanna Lundwall kom fyrst.  Þetta er þriðja árið hennar, hún kom í end apríl

og hjálpaði mér að starta.

Hún er ómissandi og ég vona að hún komi til mín í haust.

Kristofer er Svíi.  Hann kom snemma í maí, Kristofer spilaði á nikku þegar vel lá á honum.

Sara er einnig Svíi.  Hér er hún í þjónadressinu.

Þetta er hún Stína stuð og hvað haldið þið.... hún er Svíi.

Hér er hún Sofie í fótabaði, og hún er ...............Svíi.

Þetta er hún Milja sem hér veifar okkur en er ekki Svíi hún er sko frá Finnlandi

Þá er það hún Suvi hér er hún ný komin af veiðum, hún er Finni

Hér er hún Sjöfn í þjónadressinu sínu.  Sjöfn býr á Ísafirði og var hjá okkur um tíma.

Johanne Walle er Norsk og er kærastans hans Ingþórs.  Hún var um tíma hjá okkur.

Ekki má gleyma Sigga og Dísu en þau birtast alltaf þegar þörfin er mest. 

þau eru frá Ísafirði.

 Vilhelm Snær er hjá okkur um tíma í haust.

Hann er flottur í Pizzunum.

Þá er það kallinn í brúnni. 

Stelpurnar sögðu að þetta væri eins og í herbúðum hér hjá mér

og færðu mér derhúfu sem hæfði starfinu

 

 

 

Rok en samt fallegt

Það getur verð fallegt þó svo að veðrið sé vont.  Ég skrapp niður í fjöru í rokinu í gær til að taka myndir.  Ég mátti til með að lofa ykkur að njóta þess aðeins með mér.

 

 

 

 

 

 

 

 

Hetjur dagsins

Eins og ég sagði þá fengum við frábært sumar.  Er hægt að hafa það betra, ég bara spyr?

En síðustu daga eða viku hefur rignt út í eitt.  En svo merkilegt sem það nú er þá hefur það ekki stoppað tjaldgesti frá því að tjalda.  Það getur verið hálf dapurt að horfa á fólk rembast við að koma tjöldunum upp í hífandi roki og rigningu.  Þetta eru auðvitað bara hetjur.  

Frábært, frábært

Já það er víst ekki hægt að segja annað en að þetta hafi verið frábært sumar.  Veðurblíðan var auðvitað einstök sem gerði þetta allt mikið betra.  Ótrúlega mikið af gestum og flott starfsfólk.

Eins og þið sjáið þá hef ég þjáðst af svokallaðri blogg leiði frá því um jólin.  En ég hyggst bæta úr því núna.  Næstu daga kem ég til með að segja ykkur frá sumrinu í stórum dráttum.  Ég ætla að segja ykkur frá því sem við höfum verið að gera, frá því sem við ætlum að gera, frá gestunum sem komu, frá starfsfólkinu og síðan en ekki síst frá kæru sem við fengum á okkur frá nágranna okkar sem einnig rekur hótel.  Sú kæra er reyndar brandari ársins.

En hvað um það hér kemur falleg mynd sem tekin er yfir víkina okkar.

Mynd Kristofer

Hverjar eru líkurnar??

 Já, hverjar eru líkurnar á að hjón sem gefa hvort öðru tvær jólagjafir hvort gefi hvoru öðru sömu gjafirnar.

 En það fór nú svo með okkur hjónin.  Ég ákvað að gefa manninum mínum bók, en þar sem hann les ekki mikið ákvað ég að gefa honum bókina “Vasast í öllu” en bókin fjallar um endurminningar Sveins í Kálfsskinni en hann er eins og maðurinn minn, bóndi. Keran (maðurinn minn) ákvað einnig að gefa mér bók, en öfugt við hann þá er ég alæta á bækur.  Hann gaf mér bókina “Vasast í öllu” og grunar mig að hann hafi valið hana vegna þess að þetta er hugsanlega eina bókin sem hann gæti lesið sjálfur, og það skipti svo sem ekki miklu þar sem ég les allt. 

Nú var komin að hinum pakkanum en það var DVD ég gaf honum diskinn Út og suður.  Hann gaf mér einnig DVD og hvaða diskur ætli það hafi verið?  Jú það var út og suður. Er þetta ekki ótrúlegt? Ég gaf honum síðan 3 pakkann en það var verkfæraskápur með öllum verkfærum. 

Sem betur fer var 3 pakkinn hans ekki verkfæri.

Þorláksmessu hefð

Þegar ég var lítil stelpa þá var pabbi alltaf á sjó, en hann var heima um jólin. 

Pabbi fór því ekki oft með okkur systrunum í búðir.  En á þorláksmessu á meðan mamma var að þrífa þá fór hann með okkur í búð.  Hann fór með okkur í verslun Ara Jónssonar, en það var bóka búð með meiru.  Síðan hefur það haldist við í minni fjölskyldu að ég kaupi þorláksmessubækur fyrir alla í fjölskyldunni. 

Meðan krakkarnir voru litlir þá voru þau bara að fá Andrés Önd eða eitthvað í þeim dúr.  Þegar þau stækkuðu kom í ljós hvort þau höfðu á huga á lesa góða bók, þeir sem það höfðu fengu áfram bók.  Enn í dag er það siður hjá okkur að kaupa þorláksmessubók fyrir jólin.

Það er dásamlegt að halda í góða siði.

Gleðileg jól

Kæru bloggvinir ég vona að þið hafið haft það gott um jólin.  Ég vil óska ykkur gleðilegs árs og þakka ykkur fyrir árið sem er að líða.   Það er búið að vera yndislegt að vera í sambandi við ykkur.   Þegar maður býr svona langt frá fólki þá er mjög gott að geta verið í sambandi við ykkur.  Þó svo að ég sé ekki dugleg að skrifa þá les ég bloggin ykkar mjög mikið, og ég lofa því að fara að kvitta fyrir mig af og til þegar ég kem inn til ykkar. Bestu jólakveðjur til ykkar allra.Birna Mjöll