Leonordó mannaskiptaverkefni 2007

Í haust gefst 6 félögum í Félagi ferðaþjónustu bænda tækifæri til að sækja heim Skotland, Svíþjóð/Danmörk eða Finnland.  Hver félagi mun dvelja í 2 vikur á ákveðnu svæði til að kynna sér fyrirfram ákveðið viðfangsefni, fá nýjar hugmyndir, læra af því sem aðrir eru að gera og margt fleira.

 Þessi ferð er tilkomin vegna styrks frá Leonardó mannaskiptaverkefni en haustið 2004 var samskonar verkefni í gangi.  Þá fóru 6 félagar á vit ævintýra til Noregs, Skotlands og Eistlands til að fá hugmyndir og læra af því sem aðrir eru að gera í ferðaþjónustu í dreifbýli.  Að þessu sinni verður áhersla lögð á viðfangsefni sem lítur að heilsu – og menningartengdri ferðaþjónustu með áherslu á útiveru og mat úr héraði/beint frá býli. Á ensku heitir þetta Leonardó verkefni ”Stay healthy, experience local culture and enjoy local food” og á þessi yfirskrift að vísa til þess sem Ferðaþjónusta bænda ætti að geta staðið fyrir í nánustu framtíð.     Þeir félagar sem hafa verið valdir til að taka þátt í þessu verkefni munu dvelja í einu þessarra þriggja landa í 2 vikur, í september eða október. 

Á þeim tíma heimsækja þeir 3-6 ferðaþjónustuaðila og dvelja 2-4 daga á hverjum bæ til þess að kynnast starfseminni betur.  Hver aðili mun einbeita sér að einu viðfangsefni eða þema, þ.e. kynna sér eina tegund af afþreyingu eða matarmenningu einstakra svæða.  Mikilvægt er að þessar ferðir verði lærdómsríkar, ekki aðeins fyrir ferðalangana, því nauðsynlegt er að miðla þessari reynslu til sem flestra.  Þeir þurfa að halda dagbók og gera skýrslu eftir ferðina í samráði við gæðastjóra. 

Í framhaldi af ferðunum og kynningu á þeim verða stofnaðir starfshópar til að vinna frekar úr þessum upplýsingum.  Það má því líta á verkefnið sem mikilvægan þátt í að efla gæðastarf og vöruþróun innan Ferðaþjónustu bænda.

Athugasemdir

[Sigurlaug B. Gröndal, 15.10.2007 kl. 20:47]

Þetta er rosalega spennandi.  Leonardó mannaskiptaverkefnin hafa skipt sköpum hér á landi bæði hvað varðar að kynna sér menntun í ýmsum greinum, vinnustaði, starfsstöðvar  og fleira. Ég fór sjálf til Leeds ásamt fleirum til að kynna okkur fræðslusetur sem TUC í Bretlandi hafa komið á fót á almennum vinnustöðum sem svo "Fræðslustrúnaðarmenn" sjá um og stýra í eins konar jafningjafræðslu. Frábær ferð og mjög fræðandi. Þetta verður spennandi Birna ferð og gaman verður að heyra meira um þetta síðar.  Ferðaþjónusta bænda og heimagerður matur og framleiðsla er nokkuð sem ég hef tröllatrú á og hver sveit og bær hefur sinn sjarma, sína sérhæfingu miðað við landslag, landgæði og sérstöðu. Meira af þessu! Bið að heilsa öllum.  Kær kveðja úr Höfninni. 

[Ásthildur Cesil Þórðardóttir, 17.10.2007 kl. 10:29]

Mjög gott mál, og ekki veitir af fyrir ferðaþjónustuna, að hleypa þar inn lífi.